Phili 3 | BEF | STEP | Nalalu'nigita, ka mone ya huto lu su halube'mu nohube. Sipi Botiuba komopatinigu sabiyana lolo hu lepalalibe. Ana kaga ana suhi huto koyoto aku'i lu lepilube luto keheli'ohuna ya'ma kana keta mehu'ehina to lenalitoga ya'ma mino moloto nohuto lenele'mo hetofa hu lepalalibe.

Philippians 3

Hu'mamofihi bulo mino bati huto minalutamofihi lamana'a

1 Nalalu'nigita, ka mone ya huto lu su halube'mu nohube. Sipi Botiuba komopatinigu sabiyana lolo hu lepalalibe. Ana kaga ana suhi huto koyoto aku'i lu lepilube luto keheli'ohuna ya'ma kana keta mehu'ehina to lenalitoga ya'ma mino moloto nohuto lenele'mo hetofa hu lepalalibe. 2 Lenali foipa nehana bona kumu kaba hilo. Enali kala suhi lite momofa'na nehana bona'magi ma lite lu lepilabe. Lenugufa laga hilenogo Hu'mau lenele'malinagihe lite nelanagi enali kumu kaba hilo. Faga lilata nehana yabe. 3 Ya'ma lugufati laga hilutauba Hu'mamofihi yagapana'i lele'mo lolo hilina meni'ibe. Lali Hu'mamofihi yagapana'i nohuta bona'i ya'ma lugufalo hu'ohutanamomu'i lamana huto minalune luto menolune. Lali Hu'mamofihi Sikalafu'uba nolehe'menogo Hu'mamofihi agoya emilata nohuta to Yesu Kilisitou lele'mo mino bati higo legelo bito nohuto nominone. 4 Lali ya huto minoto nohutaya to nani koyapa'i enali suhi luto mono'momu nugufa laga hu'ohunalo bati huto minalune luto lu'ohuna yabe. To bona'i luga'a enali enugufa laga hi'ahanalo enigi'ani liyafa nehafihe? Nani yanamomu enebe ligi'ohuna yabe. 5 Nani huto huloto nohugo yege'a 8 bulago Hu'mamofi kumu yabe lite nugufalo laga hu nete'ahanamo ni'ibe. Nani lusi Yuta bona'i nohube. Nani Yuta nagaluguti Beyaminihi panana'a huto hu'ohunamo ni'ibe. Moseu lu laga huto lu'ehina kaga'amofihi agoyana'a Felosi bona'i mono bo lolo huto mino'ohunamo ni'ibe. 6 Nani Yuta bona'magihi mono kumu amuya moloto Kilisitohi bona'magihi luba li epi'ohunamo ni'ibe. Moseu keya ka lu'ehina'a kehelito mege'i mologo bona'i luga'amagi nani kumu foipanaka mone meni'igo lamana bo nohane lite keheli'ahana.

7 To ya hu'ehinaya nani koyapa'i lili'na lito mino'ohuna yana'mu kehelugo lamana'a lolo huto ni'igo alihi ya'ma Kilisito kumu yabe luto anana'mu kehelugo fa'menena lolo hu'ehina yabe. 8 To ananasigo meni'ibe. Nani'ni Sipi Bo'ni Yesu Kilisitohi ai hapa hapa'a bu goto keheli'ohuna yamofihi mina'a tilago ana'ina luga'a silaga'i yamofihi lamana'a kehelugo fa'menena lolo hu'ehibe. Nani Kilisito hiti moneko'na hilu'ibe luto ai kumu yabe luto nigi'ni hiti to nipagu hu'ehinana hiti to nanitoga huto hu'ehinana asaga'i heletuya'a lolo higo he'mi'ohuna yabe. 9 To nani yatai aitoga mino hepiloto Moseu lu laga hu'ehina kamofihi mege'i molo'ohunalo Hu'mamofihi bulo bati huto minaluna meni'ibe. O'e, Kilisitou nele'mo bati hilibe luto ai kumu keheli amuya molo'ohunalo Hu'mamofihi bulo bati huto nominobe. Hu'mau anana'mu foipana'ni li he'mi netoloto nele'mo bati hu'ehinagihe. 10 To nani yatai Kilisitohi hapa'a keheliya ilube luto to ai fili'ehinaguti ho tise'namofihi amuy'a nanitoga huto hilibe luto to ai keta hinana gupisalo mele ete'ahanamo molo emito kehelilube luto to ai'a fili'ehina hapa'a mege'i moloto fililube luto nipagu nohibe. 11 To henabe lutobe? Ya huloto'ni buto fili'ehinaguti ho ti'ehina li huto hilufihe? luto kehelito nohube.

Lamana'a bu go bati hu'ohuto hololu luto nobube

12 Nani ya'mana Kilisitohi hapa'a ali su ho'ohube luto liluna'a mehube. To komopa'niuba ya'ma keta mehuse huto ni'ibe luto luse mehube. Fa'mene Yesu Kilisitou nele'mo'ehinamo'mu aitogati amuyana'a kosaba'i lilube luto amuya moloto nohube. 13 Nalalu'nigita, nani Kilisitohi hapa'a keheli'ohunamofihi ali su ho'ohuna yabe luto menolube. O'e, nani ya'ma lolo hulata nohube. He'mi'ohuna kapo nemegesaga ni'igo yana'mu kehelise mehube. Nubulo nominana nasana yamofihi lilube luto nayahi luga luga bata hulata nohube. 14 Yamu'i nani yokolo'na hite hololu lilata nehana bona'i suhi luto mina'a lilube luto amuya moloto nohube. Ana mina'a henana ni'ibe? Hu'mau Yesu Kilisito kumu luto kokuluma kapolo nele'mo malalinamo ni'ibe. Ya'ma lilube luto gili gili huto amuya moloto nobube.

15 To lali asaga'i, Hu'mamofitoga mino ule'ale hulata nohuta bona'magita ana suhi luto minomo buto minalune. Kaga nolunamofihi kehelinogo kapo'a fato suhi nohinogomo Hu'mau ai li fana telenogo yamofihi keheli bebe salune'mu habe. 16 Ya hu'ehinaya bu'ohuta Hu'mau lelepi'ehina kapo moloko bilune.

17 Nalalu'nigita, lenali asaga'i ya'ma kohe to'ehinogo'ni yamofihi bu negete analoko nemege tete alo. To bona'i luga'a ana suko hite nemege'i nemalana nehago lenali ya'ma bu enegelete ana enigiyakagu malalo. 18 Nani koyapa bona'i luga'amofi kumu ka lu lepiba lepiba hu'ohuna ni'ibe. To yata'isi ya'ma yibiguti aku'i mone lu nolepube. Bona'i mone'amagi Kilisitohi bona'a nohune lite nelanaya aku'i Kilisitou malipu yafalo fili'ehinamofihi luba li emilata nehana suhi lite fatehe bona'i neminabe. 19 Bona'i yanamagi enugufa'ani enibita hulata nohinamofihi hofa to'ehinana yanauba enogo'anifu lolo hulata nohibe. To fato fato'nauba enubuya hilina'mu golemehi kelata nehabe. To ma melugu nasana'muko keheli keheli hulata nehabe. Ya nehana'mu lite logo hepalugu bilune'mu nehabe. 20 Ya hite nehinogo lali ya'ma kokuluma afo'agita nohuto lenubuto bilata bo, Sipi Bo Yesu Kilisito ai kokulumaguti limilina'mu geba huto nominone. 21 Ai silaga'i li nupa huto kafiluga enele'mo malago ai kafopaluga mololata kaba nohina amuya'aloti ya'ma lapa mebina lugufa li gololo tilenogo ai'a fana mehe gufa'a legitana lolo hilune'mu hibe.